LAOAG CITY – Kinumpirmaran ni Mrs. Florence Bartolome iti Brgy. Sumader iti ciudad ti Batac a pimmusay ti apoko na a ni Christian James Bartolome, pito a bulan a maladaga gapo iti sakit a dengue.
Segun kenni Bartolome, nangrugi a naggurigor ti maladaga idi Agosto 25 ken kabigatan na ket kimmaro rason nga intaray da iti Rural Health Unit (RHU).
Inlawlawag na a gapo ta holiday ti Agosto 26 ket awan ti doktor isut gapo na nga insuhestyun dagiti adda iti RHU nga ipan na ti apoko na iti Mariano Marcos Memorial Hospital and Medical Center (MMMHMC) iti nasao a ciudad.
Inbatad na nakasarita na ti maysa a tricycle driver a nagluganan da nga inbalakad na met a mapan laengen iti Marasigan Clinic gapo ta isu ti kaasitgan.
Gapo iti daytoy, immanugot nga iti nasao a clinic ti pangitarayan da iti maladaga gapo ta maasian unayen iti apoko na ken atiddog ti pila iti dakkel nga ospital.
Kunana nga idi nakadanun da iti clinic ket dagus a tinaming ni Dra. Caroline Marasigan ti apoko na ken naamoan da nga adda ti kamuras ti maladaga.
Naamoan a kalpasan a naresetaan ti doktor ti agas ti maladaga ket nagawid dan.
Nupay kasta, inbatad ni Bartolome a nagtultuloy ti gurigor ti apoko na ken kalpasan ti tallo nga aldaw ket napan da iti RHU ken dimmalan iti laboratory test ket nagpositibo ti sakit a dengue.
Nairekomendar ken ni Bartolome a mapan na laengen ipan ti apoko na iti ospital idiay ciudad ti Batac ket ditoy a nai-confine ti apoko na, ken basar ti palawag ti doktor ket nag-internal bleeding ti maladaga.
Innayon na a saan na nga ipabasol kenni Marasigan ti pannakatay ti apoko na ngem kunana a no mabalin ket dimmalan kuma iti laboratory ti maladaga amangan no nasalbar pay ti biag ti biktima.
Kabayatanna, inadmitir ni Dra. Caroline Marasigan a kamuras ti ummuna a diagnosis na iti pimmusay a maladaga iti nasao a ciudad.
Nupay kasta, kuna ni Marasigan a binalakadan na ti kadwa ti maladaga nga agsubli da kalpasan ti tallo nga aldaw ngem saanen a nagsubli.
Segun kenni Marasigan, no saan a bimmaba ti gurigor ti maladaga ket isyuwat da ti blood test.
Inbatad na a gapo ta saan a naisubli iti clinic ti pasyente ket saan nan a namonitor ti kasasaad ti maladaga.
