LAOAG CITY – Nagnagna dagiti pito a construction worker manipud iti Malabacat City Pampanga tapno laeng makaawid iti ili ti Paoay.
Segun kenni Mr. Carlo Tenerife, residente iti Pasil iti ili ti Paoay, kadua na dagiti kabarangayan na a da Joey Cabuntocan, Jordan Cabuntocan, Joseph Cabuntocan, Christian Tolentino, Boni Tagatac, kenni Marvin Piga agpapada a nagnagna manipud iti nasao a lugar.
Itay bigat ket nakadanun da iti ili ti Narvacan, Ilocos Sur ken immabot ti sumagmamano nga aldaw a pinagpagna da manipud iti Mabalacat, Pampanga.
Inyestorya ni Tenerife dagiti nasapasamak bayat ti panagpagna da kabayatan ti lockdown iti intero a Luzon.
Kuna na nga umuna a nacheckpoint da iti Bamban, Tarlac no sadino a pinammigat dagiti kameng ti PNP dagitoy.
Idi nakadanun da iti Capaz, Tarlac ket adda ti nangilugan kadakuada agingga iti Tarlac City.
Inbatad na a ti nagpamakan pay ti driver ti pick-up a nangilugan kadakuada.
Inlawlawag ni Tenerife nga ad-adu ti gundaway a nagnagna da gapu ta dagiti nangilugan kadakuada ket nagpatingga laeng kadagiti destinasyon da.
Segun kenni Tenerife, awan met ti nagbalin a problema iti mainom a danum ken ti taraon gapu ta maik-ikkan da babaen kadagiti otoridad iti kada checkpoint ken kadagiti sumagmamano a pagtaengan.
Innayon na nga adda ti parte iti highway nga awan dagiti pagtaengan a pagdawatan da ti danum rason nga iyanus da ti magna agingga a makakita da ti pagtaengan.
