LAOAG CITY – Pito ti baro a kaso ti covid-19 a naimaldit ditoy probinsya idi kalman, Marso 18.
Kaaduan kadagiti nagpositibo ket APOR ken Locally Stranded Individusal (LSI).
Basar iti gobierno probinsyal, ni IN-C915 ket agtawen ti 29 a lalaki ken naggapo iti Quezon City idinto a ni IN-C916, agtawen ti 28 a babai, naggapo idiay Dasmariñas, Cavite, agpada dagitoy a residente iti Brgy. 7-B ditoy siudad ti Laoag ken asymptomatic.
Kabayatanna, ni IN-C917 ket lalaki nga agtawen ti 33, LSI manipod Sampalaoc Manila ken residente iti Brgy. 14-Bungon iti siudad ti Batac ken asymptomatic.
Mainaig iti daytoy, agpapada nga APOR dagiti tallo a sabsabali pay a nagpositibo nga isuda IN-C918, agtawen ti 44 a babai, residente iti Brgy. Poblacion 1 iti ili ti Pagudpud, Ambulant vendor; IN-C919, agtawen ti 23 a lalaki kenni IN-C920, agtawen ti 51 a babai, agpada dagitoy a meat vendor idinto a ni IN-C921 ket agtawen ti 50 a babai, local resident ken agpapada dagitoy a residente iti Brgy. Poblacion 2 iti ili ti Pagudpud.
Iti agdama ket agpapada a naka-isolate dagiti baro a kaso ngem saan pay a masinunuo no nakaalaan da ti virus.
Addan pakabuklan a 143 ti aktibo a kaso ti covid-19 ditoy probinsya idinto nga awan ti nainayun iti bilang dagiti nakarekobre ken nagtalinaed nga uppat dagiti pimmusay.
