LAOAG CITY – Inbatad ni Major Roxanne Parado, ti mangidadaulo ti Contact Tracing Team ditoy probinsya nga iti agdama ket adda ti pito a kaso ti delta variant ken tallo a kaso ti alpha variant ditoy ciudad ti Laoag.
Inlawlawag na a dagiti dua a kaso ti Alpha variant ket naadmit da iti Mariano Marcos Memorial Hospital and Medical Center iti ciudad ti Batac idinto a ti maysa ket pimmusayen.
Inbaga na a ti dua a naadmit iti ospital iti ciudad ti Batac ket saan nga ammo no nakaalaan da ti virus idinto a ti pimmusay ket naala na iti pagtrabahoan na no sadinno nga ado da nga agkakatrabahoan a naapektaran.
Kabayatanna, kuna ni Parado a maysa kadagiti tallo a kaso ti delta ditoy ciudad ti Laoag ket healthcare worker ken possible a naala na ti virus manipod iti trabaho na wenno iti mismo a kapamilya na gapu ta ado da ken nagpositibo amin a miembro ti pamilya da.
Innayon na a dagiti dadduma a kaso ti delta ken alpha variant ket manarimaan pay laeng ti panangdeterminar da no sadinno ti nakaalaan da ti virus ken madama pay laeng ti contact tracing kadagiti nakapulapol dagiti maseknan.
Mainaig iti daytoy, inbaga ni Parado a saan a mapili dagiti maipatulod nga specimen iti Philippine Genome Laboratory no di ket dagiti laeng makita nga addaan ti nangato wenno ado unay a virus.
Kuna na a no makita nga ado unay ti virus iti specimen ti maysa a pasyente ket masapol a maipatulod ken maeksamen iti Philippine Genome Laboratory tapno maamoan no ania a variant ti nakaapektar iti maseknan.
Inpakaammo pay ni Parado a no delta variant ti kimmapet iti maysa a tao ket masapol nga ag-isolate iti 21 nga aldaw kalpasan na ti balbaliw nga agpa-RT PCR test no sadinno a no negative ti resulta na ket isunto laeng ti pannakaikonsiderar a naan-anayen a nakarekobre ti pasyente.
