LAOAG CITY – Magna nga agawid dagiti pito a lallaki iti Brgy. Curba, iti ili ti Pamplona, Cagayan a naggapu da iti Brgy. 38 Sangil iti ili ti Bacarra.
Segun kenni Federico Orlando, agtawen ti 62, kayat da nga agawid iti Cagayan gapu ta awanen ti trabaho da iti Brgy. Sangil.
Kuna na a mabain da payen iti pagkaseraan da iti nasao a barangay gapu iti panagtalinaed da iti sumagmamano nga aldaw.
Inbatad ni Orlando a nagdesisyon a magmagna dan nga agawid iti Pamplona.
Saan met a pinawilan ti agnagan ti Lorie Sahagun iti nagiyanan da a kasera.
Naamuan ti Bombo Radyo a kadua ni Orlando da Gilmar Battong, agtawen ti 22, Resdave Calania, agtawen ti 22, John Paul Cariaga, agtawen ti 21, Eddie Pacquiao, agtawen ti 53, Nelson Roxas, agtawen ti 46, kenni Ruben Galano, 46 ken agpapada da a residente iti Brgy Curba Pamplona Cagayan.
Mainaig iti daytoy, inbatad ni Police Major Rommel Ramos, hepe ti PNP Bacarra a plano da nga ipalugan dagiti pito a lallaki kadagiti lumabas a trucking.
Kuna na nga agtalinaed pay laeng iti Police Assistance Center dagiti pito a lallaki bayat nga agur-uray da ti trucking a pakiluganan da.
Inbatad ni Ramos a mabalin pay a makikoordinar da iti LGU iti Cagayan tapno makaawid dagiti maseknan iti lugar da.
Segun kenni Ramos, addan ti immuna a tinulungan da babaen ti panangipalugan da kadagiti limmabas a trucking.
Nagpalagip ni Ramos iti publiko iti panagsurot kadagiti alagaden ti enhanced community quarantine tapno malappedan ti panagwaras ti coronavirus disease 2019 wenno COVID-19.
