LAOAG CITY – Naminpinsan a dimmapo dagiti pito a pagtaengan kalpasan a nauram iti Brgy. Balaoi iti ili ti Pagudpud.
Segun ken ni Senior Fire Officer 4 Roy Bonoan, Acting Municipal Fire Marshal iti nasao nga ili, agarup pasado alas singko idi malem kalman ket nakaawatda ti report manipod iti maysa a concern citizen a mangibagbaga nga adda ti uram rason a dagusda met a napan nagresponde iti lugar.
Inbatadna a manipod kadagiti pito a pagtaengan ket adda ti pito a pamilia ti nauraman no sadino awan pulos ti naisalbar dagitoy.
Kunana nga idi nakadanonda iti nakapasamakan ti uram ket dakkelen ti apoy ken napuskol ti asok nangruna ket napigsa ti pul-oy ti angin.
Malaksid iti daytoy, inpalgakna a naaramid ti labig wenno light materials dagiti pito a pagtaengan a nangitunda ti alisto a panagramram ti apoy.
Inlawlawagna a nangrugi ti uram iti maysa a kusina kadagiti pito a pagtaengan a saan met dagus a naripar dagiti agnanaed kadagitoy kalpasan a kaadduan kadakuada ket napan nagatendar iti pasken.
Mainaig iti daytoy, kuna ni Senior Fire Officer 4 Bonoan a basar iti insayangkatda nga imbestigasion ket umabot iti nasurok-kumurang 300 a ribu a pisos ti balor iti nadadael gapu iti uram.
Naammoan nga adda ti dua a fire truck ti napan nagresponde iti nasao nga insidente.
Kabayatanna, dagus met a napan nangidanon ti tulong ti lokal a gobierno iti ili ti Pagudpud pakairamanan ti Office of the Mayor, Municipal Disaster Risk Reduction and Management Office, Department of Health ken Department of Social Welfare and Development.
