LAOAG CITY – Manamnama ti pannakaibiyahe dagiti pito a Persons Deprived of Liberty (PDLs) manipod iti Ilocos Norte Provincial Jail para iti pannakaikabil da iti New Bilibid Prison (NBP).
Daytoy ti inpakaammo ni Provincial Warden Editor Guiang iti Ilocos Norte Provincial Jail.
Segun ken ni Guiang, dagiti balud a maikabil iti New Bilibid Prison ket sumangsango iti rape ken acts of lasciviousness.
Inpasigurado na met nga awan ti problema iti pannakaibiyahe dagiti nasao a balud gapu ta naiget ti suporta ti gobierno probinsyal kangrunaan na ti travel expenses da.
Innayon na nga apaman a makompleto aminen a kasapulan a dokumento ket maibiyahe a dagus dagiti pito a balud.
Kabayatanna, inpakaammo ni Guiang a kaadoan paylaeng kadagiti balud iti Ilocos Norte Provincial Jail ket sumangsango ti kaso gapu iti illegal a droga, panagrames ken dadduma pay.
