LAOAG CITY – Nakapagpiyansa iti 30 a ribo a pisos iti tunggal maysa kadagiti pito a natiliw a nagsusugal babaen ti panagay-ayam da ti billards iti Brgy. Ben-agan iti siudad ti Batac.
Segun kenni Police Lt. Col. Mar Louise Bundoc, hepe ti PNP Batac, temporaryo a nawaya-wayaan dagiti maseknan manipud iti naipila a panaglabsing da iti PD 1602 wenno anti illegal gambling law.
Nabigbig dagiti natiliw a da Oliver Gudo, agtawen ti 42, residente iti Brgy. Ben-agan; Randolf Puyuan, agtawen ti 37, tricycle driver, residente iti Brgy. Quiling Sur; Christopher Adrian Tolentino, agtawen ti 40, tricycle driver, iti Brgy. Aglipay; Franz Anthony Ugalde, agtawen ti 29, tricycle driver, iti Brgy. Valdez; Resty Apolinario, legal age; Eric Kenneth Invencion y Esteban, agtawen ti 41, kenni Roderick Pascua, agpada a residente iti Brgy. Acosta iti nasao a siudad.
Inadmitir ni Bundoc a nabayagen a masipsiputan dagiti maseknan sipud nalukayan ti restriksiyon ti COVID-19 pandemic.
Maipalagip a nakumpiskar dagiti otoridad dagiti ramit iti panagay-ayam ti billard agraman ti pusta nga umabot ti nasurok 30 a ribo a pisos.
