LAOAG CITY – Umabot iti pito a tattao dagiti natay kalpasan ti pannakapabettak ti bomba iti maysa a minibus iti Herat City, Afghanistan.
Kuna ni Herat Provincial Hospital head Arif Jalali, karaman kadagiti natay ket uppat a babbai.
Inbatad ni Herat Taliban Commander Mawlawi Ansari a malaksid kadagiti natay ket adda ti siyam a nasugsugatan.
Inpakaammo na nga iti inisyal a panagimbestigarda ket naimula ti bomba iti fuel tank ti minibus.
Kabayatanna, agpapan a maisursurat ti damag ket awan pay ti madeterminar nga adda iti likudan ti nasao a panagbettak.
Maipalagip a sipud nasakop ti Taliban iti Afghanistan ket nagbalin a naiget ti seguridad a maipapaay iti nasao a pagilian.
Nu pay kasta, linawas nga adda ti mapasamak a panagatake iti intero nga Afghanistan.
