LAOAG CITY – Inbatad ni Mrs. Maizel Bayaca, ina ti pimmusay a pito a bulan a maladaga iti Barangay Cataban ditoy ciudad ti Laoag a ti ammo da ket gapo iti pneumonia ti nakatayan ti anak na a ni Nazarene Bayaca.
Segun kenni Bayaca, naamoan da laeng a dengue ti nakatayan ti maladaga idi naala da ti death certificate ti ubing.
Ummuna iti daytoy, kuna ni Bayaca nga idi Setyembre 3 ket napan da inpacheck-up da iti City health office ken nagsubli da iti kabigatan na ken naeksamin ti dara na, ditoy a naamoan da a bimmaba ti platelet ti maladaga.
Inistorya na nga idi Setyembre 5, inpan na manen iti CHO ti anak na ken nagbalin laeng a 50 ti platelet ti maladaga rason a nagdesisyon nga ipa-confine na iti Provincial Hospital.
Nupay kasta, kuna na a gapo ta madi latta ti sitwasyon ti anak na, saan a makaanges ken dimmakel ti buksit na ket inyakar da ti maladaga iti Mariano Marcos Memorial Hospital and Medical Center idiay ciudad ti Batac.
Kunana a na-X ray ti maladaga ken naipakatan ti nagduduma nga aparatus, ken ti resulta ti eksaminasyon ket adda ti danom iti bara ti anak na.
Innayon na a saan a naibaga kenkuana nga agsagsagaba ti sakit a dengue ti maladaga.
Naamoan nga iti Biyernes, Setyembre 6 ket naglitem ti bigbig ti maladaga ken inpalubos na a matubo ngem saan a kinabaelan ti ubing rason a pimmusay.
