LAOAG CITY – Nalaingan dagiti pito a pasyente iti COVID-19 rason nga umaboten iti 848 ti bilang dagiti recoveries ditoy probinsya.
Nupay kasta adda met iti uppat a napositibo iti nasao a virus rason nga agdagup iti 177 ti active cases ken agdagup iti 1032 dagiti kaso iti COVID-19.
Basar iti gobyerno probinsyal, dagiti nagpositibo ket da IN-C1029, lalaki, agtawen ti 32, health care worker, ken residente iti Brgy. Baligat iti siudad ti Batac; IN-C1030, lalaki, agtawen ti 53, symptomatic ken residente iti Brgy. Bani, Bacarra, IN-C1031, babai, agtawen ti 34, Market vendor, residente iti Brgy. San Pedro, San Nicolas; kenni IN-C1032, lalaki, agtawen ti 35, nakapulapol ni IN-C931 ken residente iti Brgy. Pambaran iti ili ti Paoay.
Kabayatanna, naadmit ni IN-C1031 idinto a nakaisolate dagiti tallo a pasyente.
Nagtalinaed a pito ti bilang dagiti pimmusay gapu iti COVID-19.
Iti mainaig a damag, inpakammo ni Mr. Angelo Ilaga, market supervisor iti ili ti San Nicolas a nailockdown ti merkado publiko kalpasan a nagpositibo ti maysa nga aglaklako.
Daytoy ket ni IN-C1031, babai, agtawen ti 34, market vendor, residente iti Brgy. San Pedro, iti nasao nga ili.
Kuna ni Ilaga nga amin nga aglaklako iti merkado publiko ket dumalan da iti swab test ita nga aldaw.
Naobserbaran met ti Bombo Radyo Laoag nga adda dagiti sumagmamano nga aglaklako ken aggatang nga agturong pay laeng iti tiendaan gapu ta saan a napakaammuan iti pannakailockdown ti merkado.
Naamuan a naipatungpal ti lockdown iti nasao a tiendaan idi rabii ken kageddan na a naiyuswat ti disinfection.
Iyur-uray ni Ilaga ti pammilin seknan iti panaglukat ti tiendaan gapu ta adda dagiti lako a maperdi iti uneg ti merkado publiko.
