LAOAG CITY – Inbatad ni Police Senior Inspector Joseph Calderon, chief of police ti PNP-Dingras a pito nga armas ti insuko dagiti lima a kandidato iti nasao nga ili.
Daytoy ket babaen ti iysu-uswat ti PNP nga Oplan Katok iti nasao nga ili.
Segun kenni Calderon, inpasigurado ti maysa pay a kandidato nga isuko na ti armas na iti PNP intono Huwebes.
Immuna iti daytoy, kunana a ti dumandanon kenkuana a rekord ket adda dagiti saan a naka-renew ti lisensya na a paltog ken adda met dagiti naka-renew.
Mainaig iti daytoy, kuna ni Calderon a ti aramiden da kadagiti naka-renew ti lisensya ti paltog na ket iyuswat da ti muzzle-taping sakbay ti campaign period.
Kabayatanna, inpetteng na a no saan a kayat dagiti kandidato ken kasta met dagiti ordinaryo a residente a mangisuko ti paltog da ket maiysuwatan ti search warrant operation.
