LAOAG CITY – Pito nga indibidual ti sumango ti kaso a panagsalungasing iti Article 172 ti Revised Penal Code wenno ti Falsification by private Individual and Use of Falsified Document.
Daytoy ket kalpasan a peke ti inpresentarda a resulta ti RT-PCR iti border checkpoint iti ili ti Badoc.
Nabigbig dagiti nagsalungasing nga isuda Ramil Tapang Cristobal, agtawen ti 47, driver ken residente iti Brgy. Concepcion, Malabon City kenni Ronel Gabuya Masamayor, agtawen ti 36, residente iti Brgy. Mambugto, Bacoor Cavite, agpada dagitoy a naglugan ti V1 Isuzu Boomtrack.
Karaman a natiliw a naglugan ti V2 Mitsubishi L300 nga isuda Jonathan Castro Sebastian, agtawen ti 30, driver, Marlon Sebastian Miranda, agtawen ti 28, labor ken agpada dagitoy a residente iti Brgy. Palangoy, Binangonan Rizal; Jhexter Flores Reyes, agtawen ti 29, labor ken residente iti Brgy. Calumpang, Marikina city; Pablito Galliogo Buctot, agtawen ti 45, Driver ken residente ti Brgy. Nagkaisang Nayon, Novaliches Quezon city kenni Reden Mabasa Callangan, agtawen ti 28, driver ken residente iti Bgy. Pabayanan, San Juan City.
Basar iti impormasyon ti PNP-Badoc, bayat a dumalyasat iti border checkpoint dagiti maseknan ket nangipakita dagitoy kadagiti umno a dokumento a kasapulan sakbay a makastrek ditoy probinsya kas panangsurot ti health protocol.
Nu pay kasta, naamoan a peke ti dokumento parikular ti RT_PCR test result nga inpresentar dagiti maseknan.
Kabayatanna, sumrek kuma dagitoy iti probinsya tapno agurnos wenno agtarimaan kadagiti poste ti telco.
Iti agdama ket nagtalinaed iti PNP-Badoc dagiti nadamakat suspek bayat a maisagsagana ti kaso a maipila kadakuada.
