LAOAG CITY – Mannarimaen ti pannaka-inquest preceeding kadagiti pito a suspek ti anti-illegal gambling operation babaen dagiti kameng ti Philippine National Police iti ili ti Bacarra.
Daytoy ti inpakaammo ti hepe ti Philippine National Police iti ili ti Bacarra a ni Police Major Sheryll Guzman.
Nabigbig dagiti suspek nga agtawen iti 57, 26, 47, dua nga agtawen ti 46 ken tallo nga indibidual nga agtawen ti 39 nga agpapada a residente iti Barangay Pasiocan, iti ili ti Bacarra, ken agkakabagian.
Segun ken ni Guzman naarestar dagitoy kalpasan nga adda naawat da a report nga adda agsusgal iti maysa a minatayan.
Inlawlawagna a maysa kadagiti suspek ket nakataray ngem no pay kasta ket karaman latta daytoy a mapilaan ti panaglabsing iti illegal gambling law.
Mainaig iti daytoy ket nakumpiskar kadagiti indibidual dagiti nagduduma a gambling paraphernalia kas iti braha, lamisaan, tugtugaw pakairamanan ti bet money nga aggatad ti 18,895 pesos, no sadinno a ti inay-ayam dagiti suspek ket lucky nine ken rakatak.
Iti agdama ket manamnama a sumango dagiti suspek iti panaglabsing iti Republic Act 1602 wenno ti illegal gambling Law.
