LAOAG CITY – Saan a pabor dagiti babassit a mangngalap iti plano ti gobierno nga agangkat ti walo a ribu a metriko tonelada nga ikan iti baet ti maipatpatungpal a closed fishing season ken epekto dagiti naglabas a bagyo.
Inbatad ni Ronnel Arambulo, Vice Chairperson ti Pambansang Lakas ng Kilusang Mamamalakaya ng Pilipinas wenno PAMALAKAYA, nasken nga isardengen ti gobierno ti panagangkat ti ikan ken suportaran ti local fish production ditoy pagilian.
Inpettengna nga awan ti serserbina ti importasion ti ikan gapu ta saan met a bumabbaba ti presio daytoy kadagiti merkado publiko.
Inlawlawagna nga awan ti kinapudnona nga adda ti panagkurang iti suplay gapu ta basar iti datos ti Bureau of Fisheries and Aquatic Resources, dumandanon iti 2 million metric tons iti kada tawen ti produksion daytoy ditoy pagilian.
