LAOAG CITY – Inpetteng ni House Deputy Minority Leader ken ACT Teachers Party-list Representative France Castro a saan a biktima ti political persecution ni Atty. Harry Roque isu nga awan ti pangibasaran ti plano daytoy a panangala ti asylum iti The Netherlands.
Mensahe ni Castro ke ni Roque, agawid pay laeng ditoy Pilipinas ken sangoen ti imbestigasion ti House Quad Committee mainaig iti iligal nga operasion ti Philippine Offshore Gaming Operators (POGO).
Inpetteng ni Castro, rumbeng a dalusan pay laeng ni Roque ti bagina maipanggep iti alegasion nga adda ti pakainaiganna iti Philippine Offshore Gaming Operators sakbay nga ikalinteganna ni dati a Presidente Rodrigo Duterte iti panangtingiting ti International Criminal Court (ICC) para iti kaso a crimes against humanity.
Iti agdama, adda ti maipatpatungpal nga arrest order ti Kamara kontra ken ni Roque kalpasan a i-contempt daytoy ti House Quad Committee gapu iti saan a panangisubmitir kadagiti dokumento kas ti income tax return, deed of sale ken SALN tapno mapaneknekan nga awan ti pakainaiganna iti Philippine Offshore Gaming Operators operations.
