LAOAG CITY – Pimmasan iti Sangguniang Panlalawigan ti resolosyon a nakaipalaunan ti kalikagum a masapul nga ilawlawag ti National Grid Corporation of the Philippines (NGCP) ti isingir da kadagiti Electric Cooperatives a “recovery fee” kas inaplikaran da iti Energy Regulation Commission (ERC).
Daytoy ket pakaseknan kadagiti nagastos da bayat ti panangtarimaan da kadagiti pasilidades da bayat daydi Bagyo a Nina.
Segun ken ni Sangguniang Panlalawigan Member Davinci Crisosostomo, Chairman ti Committee on Laws, masapul a detalyado nga ilawlawag ti NGCP no ania ti rason nga agsingir da ken no ania dagitoy nga isingir da kadagiti elecric cooperatives.
Gapu iti daytoy, kalikagum ni Crisostomo nga adda koma ti maangay a public hearing tapno malawlawagan ti tumunggal maysa.
Rumrumwar a no aprubaran ti ERC ti nasao nga aplikasyon ket agpaot ti panangsingir ti NGCP iti “recovery fee” agingga inton tawen 2020.
Mainaig iti daytoy, Inbatad ni Miss Lilibeth Gaydowen, pannakangiwat ti National Grid Corporation of the Philippines (NGCP) Luzon Area, no apay ken no ania dagiti isingir da iti “recover fee” nga inaplikaran a iti Energy Regulatory Comission (ERC).
Daytoy ket pakaseknan kadagiti nadaddadael a pasildides da bayat ti idadalyasat ni bagyo Nina idi 2016.
Segun ken ni Gaydowen, ti ngamin ERC ti mangiwayat ti public hearing mainaig iti nasao a banag ngem mabalin latta met ti opisina da.
Kuna na nga adda ngamin pagibasbasaran da a linteg no apay nga adda dagiti gundaway nga agipangato da iti singir ti kuryente wenno no ania ditan a mabalin nga isingir da kadagiti electric cooperatives.
Nupay kasta, kuna na nga agbasar da no anianto ti resulta ti aplikasyon da iti ERC.
Inlawlawag pay ni Gaydowen nga agpayso a ditoy Ilocos Norte ket awan unay ti nadadael bayat ti nasao a bagyo ngem gapu ta sakup ti Luzon Grid ti Ilocos Norte rason a matagamtam dagiti consumers iti pannakakiddaw ti tulong.
