LAOAG CITY – Mamati dagiti kabagyan ni Dante Ocampo Pagtama, agtawen ti 48, agpatpataya iti small town lottery (STL) ken taga Batac City a planted dagiti ebidensya a naala dagiti otoridad kontra kenkuana.
Inlawlawag ni Rosalina Torres, ikit ni Pagtama, basar ti palawag ti kaanakan na ket bayat a magmagna iti nagbedngan iti Aglipay ken Acosta ket kellaat lattan a rimuar dagiti nakasibilyan a nasipnget a paset ti lugar ken dinamag da no isuna ni Michael.
Inbatad ni Torres nga uray insungbat ti kaanakan a saan nga isuna ni Michael ket pinosasan da latta ken inkabil da daytoy iti kwerpo ti pulisya.
Segun pay ken ni Torres, adda ti pusporo a nakaipalaunan ti 500 a pisos a maipagarop a buy-bust money a naala iti bulsa ti kaanakan na, ngem inpasigurado na a saan nga ugali ni Pagtama ti agibulbulsa ti pusporo.
Rumrumuar pay a sinipsiputan dagiti pulis ni Pagtama idi napan idiay ili ti Badoc tapno mangala ti item nga isu ti maipagarop nga inlako na iti maysa nga ubing nga asset ti PNP.
Nupay kasta, inpasingked ni Pagtama a saan pulos a napnapan idiay ili ti Badoc.
Inadmitir ni Torres a nagus-usar idi ti kaanakan na iti illegal a droga ngem naminpinsan nan a naglikudan.
