LAOAG CITY – Manarimaan ti pannakaiyurnus ti plantilla position para kadagiti mangidaulo kadagiti opisina a mabuangay iti kapitolyo probinsial tapnu mairaman daytoy iti budget.
Dagitoy ket ti procurement, disability ken Cooperative Development Division.
Inlawlawag ni Governor Cecilia Araneta-Marcos a ti Disability Division ket awan pay ti nasapulan da a mangidaulo kasta met ti Cooperative Development, ngem ti procurement ket isu ti maaw-awagan a BAC weno Bids and Awards Committee.
Kunana a manarimaan ti pannakaestablisar dagiti opisina a pagyanan dagiti nadakamat a departmento.
Maipalagip nga immunan nga inaprobaran ti Sang Panlalawigan ti ordinansa a mabuangay dagitoy nga opisina, pakairamanan ti Provincial Information office nga imatmatunan ni Atty. Erme Labayog.
