LAOAG CITY – Manamnama a mangrugin iti mabiit ti operasyon ti Plastic Recycling Resource Recovery Facility wenno PRRRF iti ili ti Marcos.
Segun ken ni Mrs. Marygail Antonette Killa, mangidadaulo ti Environment and Natural Resources Office wenno ENRO ti gobierno probinsial, naikabilen ti linya ti kuryente nga agturong iti nasao a pasilidad.
Inbatad na nga umab-abot iti siyam a milyon a pisos ti nagastos ti probinsia iti nasao a proyekto ken iti pannakaiyestablisar ti maysa pay a pasdek iti nadakamat a lugar.
Mainaig iti daytoy, inbunannagna nga addan ti uppat a pasdek a naipatakder ken adda pay ti maysa a mannarimaan a maipaspasdek.
Impalgakna a maiyur-uray laengen ti pannakaikabil ti transformer sakbay nga agkiddaw da ti pannakaisayangkat ti training para kadagiti mangiwanwan iti Plastic Recycling Resource Recovery Facility.
Inlawlawagna a kumpleton ti plastic molder set manipud iti Environment Management Bureau iti rehion uno pakairamanan dagiti composting ken decorticating machine, ken dadduma pay a makinaria kas iti pulverizer, crusher ken plastic shredder.
Impatalgedna a dagiti maala nga agtrabaho iti nadakamat a pasilidad ket residente iti ili ti Marcos.
Namnamaen ni Killa a mairugi ita a bulan ti operasyon ti nadakamat a Plastic Recycling Resource Recovery Facility ti probinsia.
