LAOAG CITY – Inlawlawag ni Sang. Bayan Member Galing iti ili ti San Nicolas no apay a dua a bulan laeng nga agepekto ti pannakaipangato ti plete iti tricycle.
Ti dati a plete ket 13 a pisos ken manamnama a mapagbalin a 20 a pisos.
Segun kenni Galing, no maaprubaran ti pannakaamendar ti ordinansa iti konseho iti nasao nga ili ket ipaaprubar da pay iti Sang. Panlalawigan.
Kunana nga umabot pay iti dua a lawas sakbay a maipatungpal ti pannakaipangato ti plete gapo ta adda ti masursurot a proseso.
Inpalgak na nga apaman a malpas ti dua a bulan ket makita a kasapulan a maiyalud-od ti 20 a pisos a plete ket isu ti aramiden da.
Inbatad na pay a kalpasan met ti dua a bulan, adalen da manen daytoy no kasapulan a maipangato ti plete wenno agtalinaed a 20 a pisos, agdepende iti garaw ti presyo dagiti produkto a petrolyo.
Inyunay-unay na a saan a gapo ta dua a bulan laeng ti lungalong ket agpatingga iti daytoyen ti panagngato ti plete no diket maadal a nalaing kalpasan ti nasao a bulan.
