LAOAG CITY – Manamnama ti pannakaipangato ti plete ti traysikel ken dagiti kalesaan ditoy ciudad ti Laoag.
Inbatad ni ABC President Mikee Fariñas, chairman ti Committee on Transportation ditoy ciudad ti Laoag nga addan ti pannakisarita kadakuada ti Federated Tricycle Association (FTA) seknan ti nasao a banag.
Nupay kasta, kuna na nga iyur-uray da pay laeng ti pinal a resolusyon nga isumitir ti nasao nga asosasyon.
Saan met pay a makumpirmaran ni Fariñas no mano ti pagngatoan ti plete iti traysikel ken kalesaan ngem possible a 3 agingga ti uppat a pisos.
Inlawlawag na a no maawat da ti pinal a resolusyon ti asosasyon ket mangiyuswat da ti public hearing tapno mangngeg da met ti opinyon dagiti commuters.
Inlawlawag ni Fariñas a rumbeng laeng a maipangato ti plete ti traysikel ken kalesaan gapu ta ngimmina dagiti nagduduma a magatgatang gapu ti TRAIN law.
Segun pay ken ni Fariñas, naudi a naipangato ti plete ti traysikel ditoy ciudad ti Laoag ket idi pay 2011.
