LAOAG CITY – Pormalen a nagtugaw kas Officer In Charge ni Philippine National Police Chief a ni PLtGen. Melencio Nartatez.
Saan a nagatendar iti turnover ceremony itay bigat ni dati a Philippine National Police Chief General Nicolas Torre III nga indauloan ni Department of the Interior and Local Government Sec. Jonvic Remulla.
Inlawlawag ni Interior and Local Government Secretary Remulla a saanna nga inrekomendar ken ni Presidente Ferdinand Marcos Jr. nga i-relieved iti puesto ni Gen. Torre.
Awan ti nalabsing ni Torre a linteg basar iti inrakurak ni Senador Ping Lacson a dati met a mangidadaulo iti nailian a pulisia.
Inbutaktak ni Remulla nga ikonkonsiderar ni Presidente Marcos nga ikkan ti puesto iti gobierno ti dati a Philippine National Police chief.
Kunana nga awan ti maris pulitikana ti pannakaikkat iti puesto ni Torre.
Inpettengna a “Difficult and necessary” ti nagbalin a desision ti Presidente nga ikkaten iti puesto ni Torre.
Inadmitir ni Secretary Remulla a maysa kadagiti nagbalin a konsiderasion ti Presidente nga ikkaten ni Torre ket ti saan a panangsurot ni Torre iti nairuar a resolusion ti National Police Commission (NAPOLCOM) nga i-recall ti naipatungpal a balasahan.
Iti agdama, adda ti dua nga opsiyon ti dati a Philippine National Police Chief, daytoy ket ti ag-early retirement wenno agtalinaed iti puesto idinto a ti 4 star rank ni General Torre ket talantanen ti National Police Commission.
Basar iti linteg, maymaysa laeng iti Philippine National Police ti addaan ti 4 star rank ken daytoy ket ti mangidadaulo ti nailian a pulisia.
Kuna ni Remulla a namin-lima a daras a tinawaganna ni Torre idi rabii ngem saan a sinungbatan ni Torre ti tawag daytoy.
Inpasingkedna a duly informed ni Torre mainaig iti nagbalin a desision ti Presidente.
Kabayatanna, inpasigurado ni Philippine National Police Officer In Charge Chief PLt.Gen. Melencio Nartatez nga itultuloyna dagiti napipintas a proyekto ken programa ti Philippine National Police.
