LAOAG CITY – Inpetteng ni Israeli Prime Minister Benjamin Netanyahu iti panangraut iti Gaza.
Inbatadna nga awan ti makalapped kenkuana tapno isardeng ti pananglaban kadagiti Hamas militants.
Inlawlawagna a nupay nagikkaten ti Israeli war cabinet member Benny Gantz ket saan a daytoy ti mangipasimudaag nga isardengdan ti gubat.
Kunana a nakadepende ti masakbayan ti Israel no bilang agballigida iti laban.
Maipalagip a naglusulos ni Gantz gapu ta saannan a kabaelan pay dagiti umad-adu nga inosente a matmatay iti gubat ti Israel iti Gaza.
Kabayatanna, agtultuloy ti panangallukoy ti Estados iti Israel nga agbalin a naannad a kanayon iti panangiwayatda iti operasion iti Gaza tapno maliklikan iti pannakairamraman dagiti inosente a biktima.
Inbatad ni National Security Adviser, Jake Sullivan a napateg a protektaran dagiti sibilian.
Inlawlawagna a rumbeng laeng a siguradoen ti Israel Defense Forces nga awan ti sibilian ti mairaman.
Maipalagip iti kaudian a panangraut ti Israel iti refugee camp iti Gaza ket dumanon iti sumurok 270 a Palestino ti pimmusay no sadino adda dagiti ubbing ti nairaman ken adu pay ti nasugatan.
