LAOAG CITY – Inlawlawag ni PMaj. Joseph Tayaban, ti hepe iti PNP-San Nicolas ti napasamak a desgrasya itay parbangon iti paset ti Brgy. 19 San Lorenzo iti nasao nga ili ken puon ti nakatayan ti maysa nga indibidual.
Segun ken ni Tayaban, agpaamianan ti maysa nga aluminum van nga inturong ni Romel Bautista y Palecpec, agtawen ti 26 ken residente iti Brgy. Naguiddayan, Bantay, Ilocos Sur.
Kabayatanna, kuna na nga agpalaud met ti Euro a motorsiklo nga aggapo iti maysa a panganan ken inturong ni Hinaro Agarpao y Salvador, agtawen ti 53 ken ti kinalubbon na a ni Melgie Agarpao y Valera, agtawen ti 22 ken agpada dagitoy a tubo iti Fuga Island, Appari, Cagayan ngem agdama nga agnanaed dagitoy iti Brgy. 21 iti ili San Nicolas.
Inbatad na iti panagdaldalyasat dagiti dua a behikulo ket kellaat a nagsinnabat dagitoy iti kalsada nu sadino a ti aluminum van ket nadadael ti silaw iti sango pakairamanan ti side mirror.
Kabayatanna, gapu iti napigsa nga impact ket naipurwak ti motorsiklo agraman dagiti biktima a naglubbon.
Kuna ni Tayaban a nagsagaba iti sumagmamano a gasgas ti nakalubbon iti motorsiklo idinto a dagus a naawanan ti puot ti nangiturong ti motorsiklo gapu iti sinagaba na a nakana a sugat ken naitaray iti Governor Roque Ablan Senior Memorial Hospital ngem naideklara a dead on a arrival babaen ken ni Dr. Frankie Pete Albano.
Naamoan nga agpada nga adda iti impluwensya ti nasanger ti driver ti van ken ti nakalubbon iti motorisklo idinto a maiyur-uray ti kompirmasyon nu adda met iti impluwensya ti nasanger ti pimmusay idi napasamak ti desgrasya.
Innayun ni Tayaban nga agpada a napaspas ti taray dagiti dua a behikulo idi napasamak ti insidente ken awan met ti suot nga helmet dagiti naglubbon iti motorsiklo.
Iti agdama kuna ti hepe a nagtalinaed iti kustodyarda ti nangiturong ti van idinto nga agtultuloy ti naun-uneg nga imbestigasyon iti nasao a desgrasya.
