LAOAG CITY – Ginutigot ni Police Major Joseph Tayaban, ti chief of police ti PNP-Badoc ti publiko a no adda ti maduktalan a madi nga aramid dagiti pulis ket agderetso nga agreport kenkuana wenno tumawag iti hotline ti PNP.
Daytoy ket kalpasan nga adda ti dimmanon nga alegasyon ditoy Bombo Radyo a maipagarop nga adda ti naiyawat a nakupin a kwarta iti maysa a pulis rason nga alisto a nakalusot iti pila ti maysa a behikulo partikular iti truck.
Segun kenni Tayaban, no mapaneknekan daytoy ket posible a madusa ti pulis babaen iti pannaka-dismiss na iti serbisyo.
Nupay kasta, kunana a masapol a mapaneknekan a pudno ti alegasyon gapo ta ar-aramiden da met amin a kabaelan da ken ti trabaho da para iti pagsayaatan dagiti umili nangruna ita a panawen ti pandemya.
Inpasigurado met ti Tayaban a duktalen na no anya ti kinapudno iti daytoy nga alegasyon gapo ta nadagsen daytoy a basol.
