LAOAG CITY – Ad-adalen ti Philippine National Police (PNP) ti proposal nga i-ban iti aniaman a promosyon dagiti pulis a mairaman iti korapsyon.
No bilang maipatungpal daytoy ket agpaot ti lima a tawen sakbay a mai-promote ti siasinno man a kameng ti pulisya nga addaan ti derogatory record.
Segun ken ni Public Information Office Chief, Police Col. Jean Fajardo, iti babaen ti Republic Act 9708, saan a mabalin a ma-promote ti maysa a pulis no adda ti sangsangwen na a kaso ken madengngeg daytoy iti uneg ti dua a tawen.
Inbatad na a no maaprubaran ti baro a pagalagadan, manayunan ti tallo a tawen ti kasapulan a panaguray dagiti kunniber a pulis sakbay a makaala ti promosyon, gapu ta kasapulan paylaeng a malusutan ti sangsangwen da a kaso.
Nupay kasta, no immuna ti promosyon ken iti saan a nagbayag ket sinentensyaan ti korte, mabalin a maibabawi ken manayunan dagiti maipataw a pannusa kontra iti maseknan a kameng ti pulisya.
