LAOAG CITY – Ad-adalen ti Philippine National Police (PNP) ti gakat a panangpaiget kadagiti ubbing wenno agtutubo nga agusar ti social media.
Namunganay ti nasao a gakat iti naiwayat a 44th ASEANAPOL Conference no sadinno dagiti lider ti kapulisan ket nangipaay ti nagduduma a takder wenno komento maipanggep iti kumarkaro a security threats a karaman dagiti agtutubo ken cyberspace.
Inbatad ni Philippine National Police chief Police General Jose Melencio Nartatez Jr. a kalikagumda a tuladen ti ipatpatungpal ti Australia.
Karaman iti tinalantan iti nasao a conference ti napasamak a pammaltog iti uneg ti pagadalan idiay Tacloban City no sadinno a karaman ditoy dagiti agtutubo.
Innayon ni Nartatez a kalpasan ti pannakitaripnongna kadagiti kaparanget a pagilian ket adda dagiti linteg dagitoy a mabalin a maikonsiderar nga ipatungpal ditoy pagilian.
