LAOAG CITY – Ad-adda pay a mapaigetan ti panagmonitor ti Philippine National Police (PNP) intero nga Ilocos Norte tapno masigurado nga awan dagiti pampubliko a lugan nga agpasada.
Daytoy ti inbatad ni Police Major Rely Layug, ti pannakangiwat iti Ilocos Norte Police Provincial Office (INPPO).
Inbatad na nga idi kalman ket nagwarning da pay laeng kadagiti sinita da a nagpasada a pampasahero a jeep ken tricycle.
Nupay kasta, inpanamnama na nga ita nga aldaw ket naan-anayen nga ipatungpal da ti naipalaon a pagalagadan mainaig iti naipatungpal nga Enhanced Community Quarantine iti intero a Luzon.
Inadmitir ni Layug a nakurang dagiti us-usaren da a protective gear da ngem masapol a no ania laeng ti mabalin da nga usaren ket isu iyan-anay da.
Kabayatanna, inbatad na a dagiti residente ditoy probinsya nga aggapo iti sabali a lugar ket pastreken da gapu ta isu ti pammilin ni Governor Matthew Marcos Manotoc.
Nupay kasta, kuna ni Layug a dagiti saan a taga Ilocos Norte nga umay nga awan ti napateg nga aramiden da ket saan da a pastreken dagitoy.
