LAOAG CITY – Naipilan ti PNP-Adams iti piskalya ti reklamo nga illegal recruitment, estafa ken illegal detention babaen ti regular filing kontra ken ni Sheryl Soto, addaan ti umno a tawen ken residente iti Brgy. Navotas ditoy ciudad ti Laoag.
Daytoy ti inbatad ni Police Lt. Eddie Valdez, ti chief of police iti ili ti Adams.
Iti eksklusibo ngainterview ti Bombo Radyo Laoag ken ni Valdez, inbatad na a nagpammarang ti suspek kas maysa nga Agent ken Recruiter iti maysa a pribado a recruitment agency a Z Career Edge Inc. idiay 577 A Padre Faura Street, Ermita, Manila.
Segun ken ni Valdez, naallukoy ti suspek ti biktima a ni Leriza Avelino y Abendanio, agtawen ti 28, naasawaan ken residente iti Poblacion 1 iti ili nga Adams gapu ta inkari na nga awan ti bayadanna a placement fee ken ibaklay amin ti Agency da ti magastos na a mangala ti pasaporte, ken iti idadalan na ti medical, TESDA Training, OWWA, Training ken Briefing.
Nupay kasta, iti kaadda ti biktima iti nagtarusan na idiay Manila ket maipagarop a dinawatan metten ni Soto ti kwarta para iti pannakaiproseso dagiti pepeles na.
Inbatad ni Valdez a basar pay ti palawag ti biktima, kabayatan ti pannakaiproseso dagiti papeles na ket napawilan a rumuar iti nagtarusanna idiay Brgy. 168, Deparo, Novaliches, Caloocan City.
Innayon na a makarwar laeng ti biktima no adda ti mapanna asikaswen a papeles na ngem adda pay ti mangkuykuyog kenkuana.
=OVER=
Kuna pay ni Valdez a basar ti biktima, nai-schedule ti flight na a mapan idiay Saudi Arabia idi Agosto 22 ita a tawen ngem sakbay ti papanna iti erupuerto ket inpakaammo kenkuana ni Soto a saan a matuloy gapu ta na-revoked ti plane ticket na.
Naamoan a ti palawag ni Soto ken ni Avelino no apay a narevoked ti plane ticket na ket gapu ta as-asikaswen da pay laeng ti pagserkan na a trabaho.
Ditoyen a nagdudua ni Avelino ket nagawid ditoy probinsya ken napan nagreklamo iti PNP-Adams.
