LAOAG CITY – Ad-adda pay a pinaigetan ti Philippine National Police ti panagmonitor ken panagsita da kadagiti motorista iti ciudad ti Batac iti opisyal a panangrugin ti pannakaipatungpal ti provincial ordinance a panagisuot ti high visibility vest iti intero nga Ilocos Norte.
Daytoy ti inbatad ni Police Lt. Col. Adrian Gayuchan, ti chief of police iti ciudad ti Batac.
Nupay kasta, kuna ni Gayuchan a saan da paylaeng nga agtiliw wenno tiketan dagiti motorista nga awan ti suot na nga high visibility vest no di ket ballaagan da laeng dagitoy.
Inlawlawag na a no adda dagiti masita da nga awan ti high visibility vest na ket isudan a mismo ti mangipaay kas regalo da ita a paskua.
Innayon na a babaen iti daytoy ket matulungan da pay dagiti maseknan a motorista.
Mainaig iti daytoy, inpakaammo ni Gayuchan nga apaman a matappugan ti Enero 2024 ket isunton ti panangpaiget da ti panagsita ken panagtiliw kadagiti motorista nga awan ti suot na nga high visibility vest mangrugi iti oras ti alas-sais ti rabii.
