LAOAG CITY – Nagpalagip ni PMSgt. Melanie Valeriano, ti Philippine National Police ti Aviation Security Group ti Laoag International Airport kadagiti pasahero iti nasao nga eropuerto nangruna ita nga holiday season.
Segun kenkuana, masapol nga ammo dagiti maseknan a pasahero dagiti saan a maipalubos a rait wenno banag a maitugot iti uneg ti eroplano.
Inadmitirna nga adu pay laeng dagiti makumkumpiskar a maipawil a banag manipud kadagiti pasahero a mangitunda ti pannakaitantan ti panagbiaheda.
Inlawlawagna nga iti agdama ket naruay dagiti pasahero ti eroplano gapu iti umas-asideg a pannakaselebrar ti paskua.
Innayonna a dagiti bala nga ibilang dagiti pasahero nga an-anib ket naiget a maipawil ken makumpiskar dagitoy.
