LAOAG CITY – Madanagan ti Philippine National Police Aviation Security Group ti panagngato ti bilang dagiti bomb jokes kadagiti nagduduma nga eropuerto ditoy pagilian.
Rumrumuar iti datos ti nasao a police unit a 11 a kaso ti nairekord iti umuna a kagudua ti tawen 2024 idinto a pito laeng a kaso ti nairekord idi 2023 manipud Enero agingga Disiembre.
Patien ni Philippine National Police Aviation Security Group-Investigation Division Chief Police Colonel Christopher Melchor a ti kaawan ken saan nga umdas a pakdaar seknan iti daytoy a krimen ti mangituntunda kadagiti pasahero a mangaramid iti kastoy nga aktibidad.
Kinunana pay a mabalin a saan nga ammo dagiti pasahero ti pannusa kadagiti aktibidad nga agsulangasing iti pagannurotan kadagiti eropuerto kas iti bomb jokes, isu nga agtultuloy a ngumatngato ti bilang dagiti agar-aramid iti daytoy.
Nu pay kasta, nagpakdaar ti opisyal a dagiti pasahero a maduktalan a mangiyuswat ti bomb joke threats bayat ti kaaddada kadagiti airport wenno iti uneg ti eroplano ket saan laeng a maparuar no di ket mamulta ken mapilaan ti maiyannatop a kaso.
