LAOAG CITY – Inbatad ni Police Major Rommel Ramos, ti chief of police iti ili a Bacarra nga agtultuloy ti panagsursur da kadagiti nagduduma a barangay iti nasao nga ili tapno kataripnong da dagiti opisyal ti barangay.
Inlawlawag na nga iti pannakitaripnong da kadagiti opisyal ti barangay ket binalakadan da dagitoy a no dagiti laeng nalalag-an a problema iti lugar da ket isuda pay laeng ti umuna a mangsolbar.
Kuna na a no saanda kabaelan a solbaren ti problema kas ti riri ti maysa a pamilya ket isunti panagpatulong da ti PNP.
Innayon na a no dagiti nadadagsenen a problema ti mapasamak iti uneg ti barangay kas ti pammapatay, panagrames ken dadduma pay ket masapol nga umuna nga ireport da iti PNP.
