LAOAG CITY – Isagsaganan ni PNP-Bacarra ti kaso kontra kadagiti agmanugang iti Bngy. 6 ti nasao nga ili a panaglako ket panagikot ti maipawil a droga ken direct assault.
Daytoy ket gapu iti maipagarup a pannakibiang ti katugangan a lalaki idi nakita nga inarestarda ti manugang na kalpasan ti naimballigian a drug buy bust operasyon kontra iti daytoy.
Binigbig ni P/C/Inps. Allan Emerson Dauz, ti Chief of Police ti nasao nga ili ti subject ti operasyon a ni Jemer Patoc, agtawen ti 32, addaan ti asawa tubo iti Bgy. 32 C La Paz, ditoy ciudad ti laoag ngem agin-in-degen iti Bgy. 6 ti nasao nga ili.
Kinuna ni Dauz a bayat a kapkapan da ni Patoc ket apagiso a sumangpet ti katungan na a ni Edgar Cabel, agtawen ti 51, partidor ket maipagarup a naganawan ken pinanggep na a tagbaten ken agawan ti paltog ti maysa kadagiti pulis.
Imbag ta nalaing ti karate ti pulis ket natipaw na ti buneng ni Cabel ken saan na a naipalubos a maagaw ti paltog na.
Kuna ni Dauz a nabayagen a sipsiputanda ni Patoc gapu ta adda iti watchlist ket ita laeng a nagpursige.
Kas resulta, naala da iti ikot ni Patoc ti maysa a plastic sachet a naglaon ti maatap a shabu nga agbalor ti 500 a pisos, ti marked na a 500 a pisos ken sabali pay a maysa a bassit a plastic sachet a naglaon iti maatap a shabu.
Nagkedked met dagiti agmanugang a mangted ti reaksiyon.
