LAOAG CITY – Inpakaammo ni P/Capt. Joseph Calderon, Hepe ti Bacarra Municipal Police Station a nangbukelda ti tallo a grupo para iti al-alisto a pannakaipatungpal ti 5-minute response time.
Segun kenkuana, babaen iti daytoy nga addang ket maipasigurado a napaspas ti panagresponde dagiti pulis kadagiti mapaspasamak iti lugarda.
Inbatadna a dagiti tallo a grupo ket isu ti mangiwanwan kadagiti 40 a barangay iti ili ti Bacarra.
Inlawlawagna nga adda ti police mobile ken dua a motorsiklo ti naka-standby a lugan nga usaren dagiti pulis tapno insigida dagitoy a makapagresponde kadagiti insidente.
Malaksid iti daytoy, kuna ni P/Capt. Calderon nga adda ti uppat a radyo nga inted ti higher headquarters kadakuada para iti al-alisto met a komunikasion.
Immuna iti daytoy, inbilin ni Philippine National Police Chief Police General Nicolas Torre III ti naiget a pannakaipatungpal ti 5-minute response time kadagiti amin a pulis iti intero a pagilian.
