LAOAG CITY – Inpakaammo ni PMaj. Joseph Tayaban, ti Hepe ti Philippine National Police iti ili ti Badoc a nangisayangkatda ti Clean-up drive kadagiti kamposanto iti nasao nga ili.
Segun kenkuana, maysa kadagiti gagem iti nasao a banag ket madalusan dagiti tanem a saan pay a nadalusan iti daytoy maudi nga aldaw a panagdadalus kadagiti tanem dagiti kameng ti pamilia a simminan iti biag.
Inbatadna a babaen iti daytoy a ganuat ket matulungan dagiti umili a posible a manipod pay kadagiti nasusulinek ken kabangibang a lugar rason a saandan a makapan iti kamposanto tapno agdalus kadagiti tanem ti ay-ayatenda iti biag.
Kunana a nariparda nga adda dagiti tanem nga agpapan iti daytoy a gundaway ket saan pay a naikkat dagiti rugit ken basura nga adda iti aglawlaw daytoy.
Inlawlawagna nga adda pay dagiti nabati ken nakapenpen a basura nga adda kadagiti asideg iti tanem dagiti natay a mabalin a saan nga inakup dagiti napan nagdalus iti kallabes.
Gapu iti daytoy, nagballaag ni PMaj. Tayaban a saan nga ibati dagiti basura a naukkon kalpasan a nagdalus dagitoy tapno nasaysayaat met laeng sakbayda a tumalaw.
Mainaig iti daytoy, inpalagip ti Hepe ti Philippine National Police iti ili ti Badoc a saan a gandaten nga agitugot kadagiti naiget a maipawil a banag ken arak gapu ta dagus dagitoy a makumpiskar.
Kabayatanna, naammoan a kadua ti Philippine National Police iti ili ti Badoc dagiti Barangay Officials ti Brgy. 4-A, Saud a nagdalus iti Roman Catholic Cemetery ken dagiti opisyal ti Brgy. 4-B, Aring a nagdalus met iti Public Cemetery.
