LAOAG CITY – Agtultuloy ti naiget nga imbestigasyon ti Philippine National Police iti ciudad ti Batac seknan iti panagtapwak ti maysa a pasyente iti Mariano Marcos Memorial Hospital and Medical Center manipud iti maikapat a kadsaaran.
Segun kenni Police Lt. Col. Adrian Gayuchan, ti hepe ti PNP-Batac, ti biktima ket agtawen ti 36 ken residente ditoy ciudad ti Laoag.
Basar iti PNP, ti biktima ket nai-confine iti nadakamat nga ospital gapo iti gandat na a panagpakamatay babaen iti panaginom na ti oxalic acid.
Iti inisyal pay nga imbestigasyon ti PNP, saan a nasipitan ti mangbanbantay iti biktima nga inikkat na ti deztrose na ken napan iti tawa ken ditoy metten a timmapwak ken nagdisso iti hood ti maysa a lugan.
Gapo iti daytoy, nagsagaba ti nakana a sugat ti biktima ken naideklara a pimmusay.
