LAOAG CITY – Inpakaammo ni PLt. Col. Mar Louise Bundoc, ti hepe iti PNP-Batac nga awan ti nairekord a nadangran kabayatan ti napigsa a tudo nga intunda ti bagyo Florita kageddan ti panagngato ti lebel ti danom iti Quiaoit river.
Segun ken ni Bundoc, dagus a nakaresponde ti kapulisan ken dadduma a response team iti siudad tapno masolbar ti panaglayus kadagiti sumagmamano a lugar.
Kuna na a gapu iti panagngato ti lebel ti danum iti Quiaoit river ket namonitor daytoy nga insegida ken naikkat dagiti kayo nga isu ti nangabbeng ti ayos ti danom.
Inpakaammo na nga umabot iti 30 a minutos sakbay a napagsubli ti ayos ti karayan ken nages-es ti danom a posible koma a nagturong iti nagduduma a barangay.
Immunan nga inpakaammo ni Bundoc a maysa nga aldaw sakbay a napasaran ti epekto ti bagyo ket naka-full alert ti kapulisan.
Inbatad na a sumagmamano met kadagiti nalayus a barangay ket iti Brgy. Baay, Nalupta ken dadduma pay.
