LAOAG CITY – Inadmitirni PLt. Carlo Rabago, ti hepe ti PNP iti ili ti Burgos a marigatan ti kapulisan iti pannakaimbestigar ti pannakatay ti maysa a mangisursuro kalpasan a nakadungpar ti walang nga aso iti paset ti Sitio Der-ap iti Brgy. Ablan iti nasao nga ili.
Kuna ni Rabago nga iti panagtultuloy ti imbestigasyon ket awan ti maiyestablisar ti kapulisan nga agtagikua iti nadungpar nga aso.
Inbatad na a gapu iti daytoy ket addan ti pannakaikoordinar na kadagiti opisyal iti nasao a barangay tapno maamoan ti agtagikua iti aso.
Immunan nga inpeksa ti pamilya ti biktima ti kalikagumda a maipaayan ti hustisya daytoy.
Maipalagip nga agawid koman ti biktima iti ili ti Bacarra idi napasamak ti desgrasya.
Iti palawag ni SFO4 Dominador Ignacio, municipal firemarshal iti Bureau of Fire Protection iti ili ti Burgos a posible a natukkol ti tengged ti biktima, nagsagaba ti sugat iti saka, ima ken nakana a sugat iti ulo na.
Pimmusay daytoy bayat a matamtaming iti Mariano Marcos Memorial Hospital and Medical Center iti siudad ti Batac.
