LAOAG CITY – Inbatad ni Police Lt. Ceasar Mangaoil, ti chief of police iti ili ti Carasi nga agtultuloy ti naiget a panagmonitor da kadagiti agpaputok ti nasao nga ili.
Daytoy ket gapu ta adda ti ordinansa iti nasao nga ili a maipawil ti aglako ken agpaputok iti aniaman a klase ti paputok.
Segun ken ni Mangaoil, ado adda dagiti mabalin nga usaren dagiti residente iti nasao nga ili tapno makaparnuay da ti ringgor kangrunaan na iti panangsarabo ti baro a tawen.
Kuna ti opisyal, kas iti ar-aramiden da ket mabalin nga agusar lattan dagiti residente ti torotot wenno mabalin met ti kanyon bamboo ken dadduma pay a mabalin a mangparnuay ti ringgor malaksid kadagiti paputok.
Mangnamnama ni Mangaoil nga awan dagiti residente a manglabsing iti ordinansa tapno naan-anay a naragsak ti panangsarabo ti baro a tawen.
Naamoan a ti kangrunaan a rason no apay inpasa ti ili ti nasao nga ordinansa ket tapno maprotehiran ti aglawlaw.
