LAOAG CITY – Inbatad ni Police Major General Benjamin Acorda Jr. a ti maysa kadagiti kangrunaan a prayoridad na iti panangidaulona ti Philippine National Police ket ti mangpasubli ti naan-anay a panagtalek ti publiko iti nailian a pulisya.
Inpetteng na a saan a mailibak nga adda dagiti sangsangwen nga isyu ti Philippine National Police iti agdama ngem pursigido a mangpasubli ti naan-anay a panagtalek ti publiko.
Inmandar na iti sibubukel nga organisasyon a masapol a maiparikna ken maipakita da kadagiti tattao ti pudno a serbisyo.
Inadmitir na pay a saan a nalaka ti agbalin a mangidaulo iti nailian a pulisya ngem babaen ti tulong ti komunidad, dagiti naelektaran nga opisyal ken adda iti babaen na, Armed Forces of the Philippines ken dadduma pay ket agtalek a maipatungpal amin ti kalikagom na nga ipatungpal iti organisasyon da para ti pagsayaatan ti intero a pagilyan.
Mainaig iti daytoy, inkari manen ni Acorda ti ad-adda pay a tutukan da ti maipanggep ti illegal a droga iti pagilyan.
Innayon na a gutgutiguten na dagiti commanders iti amin a lebel a masapol nga ammo da ti ar-aramiden amin dagiti adda ti babaen da.
Inaramid daytoy ni Acorda kabayatan ti panagbitla na kas naisangsangayan a bisita iti programa a napaulwan ti “PAMMADAYAW” nga inorganisar ti League of Municipalities of the Philippines tapno bigbigen ken selebraran ti pannakadutuk na kas maika-29 a mangidaulo iti PNP a naiyuswat iti ili ti Bacarra.
Malaksid kadagiti kameng ken opisyal ti pulisya ket inatendaran pay dagiti mayor iti nagduduma nga ili ken ciudad ditoy probinsya ti nasao a programa.
