LAOAG CITY – Nangipaay ti pammadayaw ni PNP Chief Guillermo Eleazar kadagiti amin a kameng ti pulisya ditoy probinsya gapu iti pannakatiliw ti maysa a drug courier a naggapo idiay Quezon City no sadinno a naala iti ikot na ti ti 5.2-milyon a pisos a shabu.
Ti nasao a pammadayaw ket inawat ni Ilocos Norte Provincial Director Christoper Abrahano.
Malaksid iti daytoy, dinayaw pay ni Eleazar ti kinadalos ken kinaurnus ti aglawlaw ditoy probinsya kangrunaan na ditoy ciudad ti Laoag.
Iti panagsarita na, inbagana a ti Ilocos Norte ti maikalima a nabisita na a rehiyon sipud nagtugaw kas PNP chief.
Inbaga na a kadagupan kadagiti police stations manipod kadagiti lima a rehiyon a nabisita na ket maibaga na naidumduma ti kinaurnus ken kinadalos ti police station ditoy ciudad ti Laoag.
Kuna na a saan laeng nga iti uneg ti police station ti nadalos no di ket uray iti ruwar.
Innayon na a daytoy ket babaen ti tulong ti chief executive ditoy ciudad.
Inbatad na pay a mapagtalinaed ti kinadalos iti ruwar ken uneg ti pnp station no adda ti disiplina iti tunggal maysa iti panangidaulo ti provincial director babaen ti tulong ti local chief of executive.
Kabayatanna, binigbig ni Eleazar amin nga effort dagiti kameng ti pulisya kangrunaan na ita a panawen ti pandemya gubuay ti covid-19 virus.
Inlawlawag na nga iti aniaman a sitwasyon ket namnamaen a dagiti laeng pulis ti sidadaan a tumulong ken agtultuloy nga agserbi kadagiti umili.
Iti baet daytoy, aminado ni Eleazar a saan latta a maliklikan dagiti maibatbato a kontrobersya iti PNP isut gapuna nga inbalakad ti PNP chief a masapol a sangwen da gaputa awan ti ilemlemmeng da.
Innayon na a siasinno man ti agkamali iti biang ti PNP ket masapol a mapagsungbat ken saan da a patunuynuyan.
Inpalagip pay ni Eleazar nga idi nagsapata kas maika-26 a PNP chief ditoy pagilyan ket simple laeng ti pammilin kenkuana ni Presidente Rodrigo Duterte, daytoy ket ti panangaramid na ti usto ken legal nga isu ita ti ar-aramiden ken ipatpatungpal na.
