LAOAG CITY – Inbilin ni Philippine National Police (PNP) Chief Gen. Rommel Marbil iti kapulisan nga isardeng ti moonlighting wenno panagraket wenno sideline kabayatan nga adda iti serbisio.
Basar iti Philippine National Police Chief, inparuk-at ti nasao a direktiba tapno nakasagana a tumulong ti alisto dagiti amin a pulis kadagiti reklamo dagiti umili ken emergency.
Kunana a responsibilidad ti nailian a pulisia a siguraduen ti kinatalged dagiti umili.
Ti pulisia ket nasken nga agbalin nga alerto kadagiti amin nga oras tapno matulungan dagiti kasapulan ti publiko.
Inlawlawag ti opisial iti babaen ti pannakaipawil iti moonlighting, mapatibker ti naikari para iti napartak ken nasayaat a panagresponde iti aniaman a situasion.
Inaramid ti Philippine National Police Chief ti nasao a direktiba kagiddan dagiti sumagmamano nga insidente ti moonlighting iti pulisia pakairamanan ti naipadamag iti kallabes nga uppat a miembro ti Special Weapons and Tactics (SWAT) team a maipagarup a nangipaay ti security service iti maysa a pribado nga event idiay Pasig City.
Daytoy nga impormasion ket inbutaktak ni Interior and Local Government Secretary Benjamin Abalos Jr.
Naammoan a dagiti uppat ket naikkaten iti puesto kagiddan ti imbestigasion ti Eastern Police District.
Kabayatanna, immunan nga inbatad ti Philippine National Police a plano daytoy a mangbukel ti special team a nakasentro iti pananglapped iti saan nga otorisado a panagusar ti lugan ti Philippine National Police ken namandar a kitaen dagiti opisial ken kameng a makipaspaset iti moonlighting.
