LAOAG CITY – Personal a nagturong ni Philippine National Police wenno PNP Chief PGen Rommel Francisco Marbil idiay Rizal, Cagayan tapno ammoen ti kasasaad ti imbestigasion iti panangpapatay ken ni Mayor Joel Ruma.
Immuna a binisita ni Marbil ti bangkay ni Mayor Ruma iti Barangay Gagabutan tapno makipagladingit iti pamilia ken kalpasan iti daytoy ket napan iti crime scene.
Inbatad ni Marbil, saan nga agsardeng ti nailian a pulisia agingga a saan a magun-od ti hustisia.
Kabayatanna, kinataripnong ni Marbil ti Rizal police ken ti Special Investigation Task Group (SITG) nga isu ti mangig-iggem iti kaso.
Addan iti kustodiar ti Special Investigation Task Group ti uppat a local police security ti Mayor tapno alaan ti salaysay ken iyur-uray laengen ti resulta ti parrafin test ken forensic ti service firearms.
Basar iti inisyal a report, napaltogan ni Mayor Ruma babaen ti sniper kabayatan ti panagkampania daytoy.
