LAOAG CITY – Inbilin ni Philippine National Police Chief Police General Rommel Marbil ti pannakaiwaras ti ad-ado a kameng ti pulisya kadagiti komunidad.
Daytoy ket tapno papigsaen pay ti kampanya ti nailian a pulisya kontra kadagiti krimen.
Segun ken ni Gen Marbil, inbilin nan kadagiti regional, provincial, city, ken municipal police a papigsaen ti kampanya kontra iti kriminalidad iti ground level kas ti Oplan Galugad, Oplan Sita, ken patrol operations.
Mamati ni Marbil a no ad-ado ti presensya dagiti pulis iti komunidad ket makatulong tapno masigurado a natalged dagiti komunidad ken dagiti umili.
Kuna pay ti Philippine National Police Chief, immunan nga inbilin na a kissayan dagiti office wenno clerical work dagiti pulis tapno ad-adda pay nga agbalin nga aktibo ti 85% ti Philippine National Police workforce kadagiti field dutiesda.
Inpalagak na a malaksid a mabantayan da ti kinatalged ti umili, sigurado nga agsubli ti panatalek ken suporta ti publiko iti nailian a pulisya.
Innayon ni Marbil a ti nasao nga addang ket paset ti panangtungpal da iti nagbalin a direktiba iti kallabes ni Interior and Local Government Sec. Benhur Abalos Jr. a maaddaan ti ‘heightened police presence’ ken foot patrol tapno al-alisto a makaresponde kadagiti krimen ken aniaman a pagkasapulan kadagiti pulis.
