LAOAG CITY – Pinalagipan manen ni Philippine National Police Chief PGen. Rommel Francisco Marbil ti sibubukel nga organisasyon ti nailian a pulisya a pagpannurayen a kanayun ti linteg ken kinapudno.
Inaramid ni Gen. Marbil ti nasao a rakurak iti naiyuswat a Command Conference iti Kampo Crame.
Ti pammalagip ni Marbil ket para iti amin a kameng ti nailian a pulisya kalpasan a nairaman ti organisasyon da iti kontrobersiyal nga operasyon dagiti ilegal a Philippine Offshore Gaming Operator iti Pilipinas.
Iti naiyuswat a panagdengngeg iti senado, inbutaktak ni retired General ken Philippine Amusement and Gaming Corporation (PAGCOR) Executive Raul Villanueva nga adda ti maipagarop a dati nga hepe ti nailian a pulisya nga adda iti payola list ti Philippine Offshore Gaming Operator ken maibagbaga a timmulong ken ni Alice Guo ken dagiti kakadwa na a makaruwar iti pagilian.
Mainaig iti daytoy, kinarit ni Marbil ni Villanueva nga ipublikar ti nagan ti dati nga hepe ti Philippine National Police a dakdakamaten na.
Inpetteng ni Marbi a dagiti kastoy nga akusasyon ket makadadael iti imahe ti nailian a pulisya isut gapuna a masapol a malawlawagan.
Basar iti datos, umabot iti 30 ti nagbalin a PNP chief iti Pilipinas ken 24 laengen ditoy ti sibibiag.
Inpasingked ni Marbil a dagiti 24 a dati nga hepe ti Philippine National Police ket paim-imbestigar nan iti Directorate for Investigation and Detective Management ti nasao nga organisasyon.
