LAOAG CITY – Nag-courtesy visit ni Philippine National Police (PNP) Chief PGen. Nicolas Torre III iti Commission on Human Rights (CHR) iti flag ceremony iti komisyon no sadinno nga isuna ti kaunaan nga hepe ti nailian a pulisya a bimmisita iti nasao nga opisina.
Gagem ti panagbisita ni Torre iti komisyon ket tapno ilawlawag ti nagbalin a direktiba na seknan iti kinnaadoan ti maarestar dagiti pulis nga isu ti pagibasaran ti performance da ket tapno makaala kadagiti promosyon.
Iti panagbitla ni Torre, nagtalinaed ti takder na a ti trabaho dagiti pulis ket ti manganop ken mangarestar kadagiti kriminal, ken mangpatalinaed ti linak, urnus ken talna kadagiti kalsada iti intero a pagilian kangrunaan na kadagiti komunidad.
Gapu iti daytoy, maibilang a dakkel a development ti ibibisita ti hepe ti nailian a pulisya iti komisyon tapno ipakita da a makikaysa da a mangprotehir kadagiti iti karbengan dagiti umili.
Nagyaman ni Torre iti komisyon para iti kanayun a panang-check da iti organisasyon ken kas partner da iti panangipasigurado nga amin nga ar-aramiden da ket maiyataday ken saan a mailabsing iti linteg kangrunaan na iti human rights.
Kabayatanna, binigbig ti Commission on Human Rights dagiti inisyatibo ni Torre ken nagkari ti komisyon a suportaran ken makitinnulong da para iti implementsyon ti warrantless arrest.
Kuna ni Commission on Human Rights Chairperson Atty. Richard Palpal-latoc a suportado da ti responsibilidad a naipabaklay kadagiti pulis a protehiran ti seguridad dagiti komunidad ken siguradwen a natalged dagiti umili.
Innayon ti opisyal nga agingga nga awan ti malabsing a linteg dagiti pulis iti panangipatungpal da iti mandato kadakuada ket agtultuloy ti panangsuporta da iti direktiba ni Torre.
