LAOAG CITY – Nagballaag ni Philippine National Police (PNP) chief Police General Rommel Marbil kadagiti aktibo a pulis kontra iti pannakibiang da iti partisan politics.
Inaramid daytoy ni Marbil kalpasan nga adda dagiti sumagmamano a nagretiro a kameng ti pulisya a nangipeksa iti suporta da ken ni Vice President Sara Duterte mainaig iti sangsangwen na nga impeachment complaint.
Inpetteng ni Marbil a dagiti mapaneknekan nga aktibo a kameng ti pulisya a karaman iti partisan politics ket mapatawan ti pannusa, karaman ditoyen ti pannakaikkat iti serbisyo.
Inpalgak ni Marbil a ti Philippine National Police ket saanna nga i-tolerate ti political partisanship dagiti aktibo a personnel ti organisasyon kalpasan ti statement of support ti PNP Academy (PNPA) Class 1991 para ken ni Vice President Duterte.
Kabayatanna, inrakurak ni Philippine National Police spokesperson Police Brigadier General Jean Fajardo nga adda ti tallo nga aktibo a police personnel manipod iti nasao a PNP class a saan a nagpirma iti statement of support para ken ni Duterte.
Inlawlawag ni Fajardo a ti alumni ti PNPA Class 1991 a nagretiron manipod iti serbisyo ket adda ti karbengan da a mangipeksa ti opinyon da gapu ta saan dan a paset ti police ranks.
