LAOAG CITY – Inpasigurado ti Philippine National Police Criminal Investigation and Detection Group (PNP CIDG) nga addan ti sursuruten da a leads tapno masigurado a magun-od ti hustisya iti kaso dagiti mapukpukaw a mammallot iti kabiitan a panawen.
Segun ken ni Criminal Investigation and Detection Group Director PBGen. Romeo Macapaz, saan man a masigurado no kaano a masolbar ti kaso ket agtultuloy latta ti panagukkon dagiti otoridad kadagiti impormasyon nga agbalin a dakkel a tulong tapno malawlawag ti kaso dagiti mapukpukaw a mammallot.
Daytoy ket kalpasan ti nagsasaruno a dimmatag iti opisina da ti pamilya dagiti biktima a maipagarop a naibelleng iti Taal Lake.
Kuna ni Macapaz saan da nga agdarasudos iti imbestigasyon tapno masigurado a makita amin nga impormasyon para iti al-alisto a pannakasolbar iti kaso.
Innayon na a saan da paylaeng a makaipaay ti dadduma nga impormasyon tapno saan a masayang ti pagrigrigatan da a panagukkon ti impormasyon a makatulong iti pannagna ti nasao a kaso.
